مش عارف لقيت بيتين الشعر دول بيلحوا عليا اوى ليه قلت لازم اخرجهم و اكتبهم و اخلص نفسى و الالحاح ده دايما بييجى بعد قرائه الجرائد صباحا بحس كده انى نفسى اقولهم لاى حد انشالله القهوجى اللى بينزلى القهوه بس هوه ذنبه ايه و لا حتى هايفهم انا بقول ايه و حتى ان فهم هايستعبط عشان القهوه دايما بيبقى عليها مخبرين جايين ياخدوا الاصطباحه . مش عارف انا حاسس ان انا باخرف يمكن من الحر المهم ادى بيتين الشعر اللى هيجننونى و لو حد واقف معاه حاجة فى الكلام اللى فات ده ميسالنيش لانى مش عارف انا كتبته ليه .
المجتمع زى الرصيف
وسخ و لازم يتكنس
فيه ناس بتعرق ع الرغيف
و ناس بتعرق م التنس
الشاعر فؤاد قاعود
3 comments:
انا مستغربه الصراحه للبيتين دول منين هوه كان بيشبه المجتع بالرصيف و الكنس وبعد كده انتقل للناس اللى بتعرق حاسه يعنى انه مفيش ترابط افكار وبعدين طيب فى ناس فعلا بتعرق على الرغيف بس برضه مهو اللى بيلعب اى لعبه بيتعب ويعرق اكيد علشان يتفوق فيها الا لو كان يقصد بالتنس الرفاهيه الزايده عن اللزوم بس يعنى اصل لعيبه التنس غلابه برضه يظهر كده ان كلاكيع العربى لسه ف دماغى ههههههههههه ومش عارفه انسى الثانويه خالص لانى كنت متعوده احلل اى قطعه بلاغه معلش طولت وكلامى غريب شويه بس يعنى هو ف الاخر وصل ف دماغنا المعنى اللى هوه عايز يقولوا
شكرا على البيتين دوول انا اول مره اشوفهم
سلام:)
معلش كل اما اكتب كومنت بمسحه اصلى بلاقينى كاتبه حاجات غلط
اختيار موفق بجد
وعلى فكرة لو قلتهم للقهوجى برضه هيفهمهم
دة يمكن يفهمهم أكتر مننا
مدونة جيدة
تحياتى
Post a Comment