سخونة

مش عارف لقيت بيتين الشعر دول بيلحوا عليا اوى ليه قلت لازم اخرجهم و اكتبهم و اخلص نفسى و الالحاح ده دايما بييجى بعد قرائه الجرائد صباحا بحس كده انى نفسى اقولهم لاى حد انشالله القهوجى اللى بينزلى القهوه بس هوه ذنبه ايه و لا حتى هايفهم انا بقول ايه و حتى ان فهم هايستعبط عشان القهوه دايما بيبقى عليها مخبرين جايين ياخدوا الاصطباحه . مش عارف انا حاسس ان انا باخرف يمكن من الحر المهم ادى بيتين الشعر اللى هيجننونى و لو حد واقف معاه حاجة فى الكلام اللى فات ده ميسالنيش لانى مش عارف انا كتبته ليه .

المجتمع زى الرصيف

وسخ و لازم يتكنس

فيه ناس بتعرق ع الرغيف

و ناس بتعرق م التنس

الشاعر فؤاد قاعود

فى الجونة

الجونة منتجع سياحى يطل على شاطئ البحر الاحمر و منتجع الجونة مكان جميل رائع فظيع و رهيب طبعا لمتوسطى الحال يكاد يكون الذهاب الى الجنة اقرب من الذهاب الى الجونة و الجونة موضوع كبير يطول شرحه و غير كده فيه ناس كتير قرات عنه او سمعت او شافته فى التلفزيون. الشئ اللى شد انتباهى لمنتجع الجونة لما شفته فى التلفزيون و هى دى اهم حاجة انهم هناك مابياجروش عجل دول بياجروا طيارات شراعية يعنى الواحد لما كان بيروح راس البر كانت امنية حياته ان ابوه ياجرله عجله يلعب بيها نص ساعة و يرجع للراجل متاخر ربع ساعة على اساس انه مش لابس ساعة فميعرفش هوه اجرها امتى انما ااجر طيارة دى باى اللى حاجة مش متخيلها اصل اللى هياجر طيارة اكيد لابس ساعة و مش اى ساعة دى اكيد ساعة جامدة جدا بس معنى كده انى لما ااجر طيارة العب بيها شوية مش هاعرف ااقول للراجل اللى بياجر الطيارات ايه .وده الموقع بتاع الجونة يمكن حد نفسه يصيف هناك و عايز يعرف تفاصيل اكترhttp://www.elgouna.com/

بس امانة على اللى يروح الجونة يبقى يجيبلى شوية اى حاجة من هناك حتى لو شوية مية بحر .