صفحة الياهوو هى صفحتى الرئيسية المفضلة التى لم اغيرها منذ عام 2003 و ذلك طبعا لانها اول حاجة شوفتها فى العالم الانترنتى و
استمر معى الاعتقاد لمدة طويلة جدا ان الانترنت هوه الياهوو و بس و ان انا ما اعتبرش دخلت على النت الا لما اشوف الصفحة بتاعة الياهوو اتحملت . المهم تاكدت مع الايام و بعد عدة محاولات من صديق لى بان موقع الجوجل احسن فى البحث و انه كمان موفر صفحات باللغة العربية للمستخدمين العرب . المهم انا مالقيتش فرق كبير فى موضوع نتائج البحث بين الياهوو و الجوجل بس فعلا لمست الفرقت فى الجوجل فى حاجات تانية . طبعا انا هنا مش بفرق بين الياهوو و الجوجل و لا انا عامل استفتاء مين فيهم الاحسن . بس اكيد فيه حاجة انا هاقولها .
الحاجة دى بقى ان الياهوو فيه حاجة معظم الناس عارفاها و هيا الياهوو جيمز ( yahoo games ) 
و انا بقى فى الجيمز ماتوصاش المهم عن طريق الشات مع صديق امريكانى وصلت للياهوو بوول او البلياردو الاون لاين . عارف ان فيه ناس كتير عارفاه مانا بقابلهم هناك .
المهم فى سنة 2004 بدات المسيرة لعبت 6924 جيم بالتمام و الكمال و تراوحى تقديرى مابين 1200 و 1500 درجة . كلام جميل فين المشكلة بقى .
المشكلة ياسادة انه و بدون سابق انذار لقيت نفسى فى يوم من الايام و انا فى احد الرومات باجهز نفسى للعب و ماسك الاستيك فى ايدى و الطباشيرة فى الايد التنية و باقول ياهاى و معايا واحد مكسيكى ظريف جدا و عامل ارقام جامدة فى اللعبة . الا و الاقى نفسى بره الروم خالص قولت مش مشكلة يمكن النت فصل بس بصيت لقيته شغال . قلت مش مشكلة يمكن فيه مشكلة فى الموفع لانها ساعات بتحصل و بيقفلوا كل الرومات عشان يعدلوا حاجات فى السيرفر و بعدين يرجعوا تانى . المهم جيت تانى يوم عشان ادخل لقيت خير اللهم اجعله خير رسالة بتقولى ان انا ممنوع من الدخول لغاية يوم الجمعة ا يناير سنة 2021 بس .
سنة 2021 معتش اعرف ادخل باسمى و الرقم اللى انا وصلتله الا سنة 2021 يكون بقى عندى 41 سنة انشاء الله .
المهم عشان التطويل بس غلبت مع الياهوو ايميلات مع كل جهات الهيلبر و المساعدة فى اارة الياهوو و طبعا و لا حياة لمن تنادى و لا لما تكون الحكومة المصرية ودن من طين وودن من عجين .
حكيتلهم الحكاية يبعتولى اميل فى رسالة مسجلة و لينكات لصفح الهيلب علما بان لافيه هيلب و لا يحزنون . حطيت السؤال فى الياهوو انسر و الاجابات اللى جتلى من عينة كان الله فى عونك , سنة 2021 يا طول بالك . موت يا حمار و هكذا
المهم انا طبعا عملت اميل تانى جديد نيو و هبدا من تانى مشوار الالف جيم .
1 comment:
هههههههههه
طيب طول بالك فات الكثير ما بقى غير القليل .. 2021 جاية هى فاضل 13 سنه بس .. بس على الله تكون لسه بتعرف تلعب جيمز :)
قصه فى منتهى الروعه بجد .. ومدونه فى منتهى الجمال .. لأول مرة ادخلها ..
الله يوفقك يارب دايما .. وخليك مع جوجل احسن مية مرة .
Post a Comment